بیانیه روز جهانی زبان مادری به زبان مازنی ( طبری)
ماری زوونِ جهانی روزِ مناسبتِ وسّه
ماری زوونِ جهانی روز، اتّا فرصت هسته تا آدمونِ فردی و جمعی زندگی دله، زوونِ جایگاهِ سر دِباره فکر هاکنیم؛ اتّا روز فرهنگی تکثرِ پاسداشتِ وسّه و یاد بیاردنِ اینتا اساسی حقیقت که زوون فقط ارتباطِ ابزار نییه، بلکه اَمه اندیشه، هویت، عاطفه و دِنیا دله زندگی هاکردنِ چتیبون ره شکل دِنه. انسان زوونِ جا فکر کِنده، تصمیم گیرنه و شه احساسات ره بیان کِنده؛ همینتایِ وسّه، زوون انسانی کرامتِ جا سیوا نَیّنی بخش هسته.
چندزوونه جامعهئون دله، حاکمیتِ برخورد زوونی تنوعِ جا، اتّا مهمِ شاخص هسته تا دموکراسی و فرهنگی عدالتِ اَنداجه بسنجیه بَوو. آموزشی نظام و اداری ساختار دله اتّا زوون و اتّا فرهنگ ره بالاته بَدین، عمل دله تونده سلطهیِ روابط ره دِباره بسازه و بقیه زوونئون و فرهنگئون ره حاشیه بَرونه. تاریخی تجربه نِشون هِدائه که خله از کشورون دله، تبعیض و نابرابریِ دروازهئون، زوونی و فرهنگی تبعیضِ جا وا بَیینه.
ایران دله هم مدرنِ دولتِ شکل بَییتنِ جا، اینتایِ جغرافیایِ ساکنِ ملل و اقوامِ جورواجورِ زوونئون و هویتئون، کمکم حاشیه دَکِتنه. اینتا روند، باعث بَیّه که «خودی» و «غیرخودی» مرزبندیئون پا بَیره و شهروندونِ اتّا بخشِ میون غریبی احساس پیش بَئه و وِنه دمبال، بعضی اقتصادی و اجتماعی تبعیضئون هم اینتا غیریتسازیِ سایهیِ بِن مشروعیت پیدا هاکردنه.
اسا ایرانِ متکثرِ جامعه اتّا تاریخی بزنگاه دله قرار دارنه. علمی، فرهنگی و سیاسی آگاهیئونِ سطحِ بالا بوردن جامعهیِ همهیِ قشرونِ میون، چه حاشیهدَکِت گروهئونِ دله و چه مسلطِ گروهئونِ دله، اینتا امکان ره ویشته از قبل فراهم هاکرده که زوونی و فرهنگی تنوع ره به عنوان اتّا ملی سرمایه، به رسمیت بشناسن. با این حال، هَنتا تنگنظری و انحصارطلبیِ صِدا گوش رِسِنه که به جای اینکه شهروندون ره حقِ صاحاب بدونن، اتّا عقبموندستهیِ چارچوب دله و حذف و دیگریسازیِ سر، نابرابرِ روابطِ دِباره بساتنِ دمبال درنه.
ایرانِ فرهنگیونِ صنفی تشکلئونِ هماهنگیِ شورا، هر جور زوونی و فرهنگی انحصارگری ره رد هاکردنِ همراه، همهیِ حقِ سر ماری زوونِ آموزشِ جا بهره بَوِردنِ وسّه تأکید کِنده. اِما آموزشی، روانشناختی، عاطفی و جامعهشناختی حوزهئونِ گتِ یافتهئونِ پایه سر باور دارمی که ماری زوونِ جا آموزش هِدائن نهتنها هیچ زوون یا فرهنگِ دیگهیِ ضرر نییه، بلکه کشورِ فرهنگی سرمایهیِ تقویت، دانشآموزونِ اعتمادبهنفسِ بالا بوردن، یادگیریِ کیفیتِ باشته بَیّن و اجتماعی همبستگیِ گسترش ره باعث وونه.
ایران دله جورواجورِ زوونئونِ تقویت، ملی وحدتِ وسّه تهدید نییه؛ بلکه اتّا پایدار و داوطلبانهیِ وحدتِ تحققِ شرط هسته.
اتّا جامعه که شه تنوع ره به رسمیت بشناسه و وِنه پاس ره بِداره، اتّا غنیته، عادلانهته و دموکراتیکته جامعه وونه.
ماری زوونِ جهانی روز دله، اِما ایرانِ فرهنگیون دِباره زوونی تبعیضئونِ رفعِ ضرورت، آموزشی سیاستئون دله بازنگری و کشورِ رسمی زوونِ پلی ماری زوونِ آموزش ره به رسمیت بشناسیینِ سر تأکید کِمبی و وه ره آموزشی و اجتماعی عدالتِ تحققِ مسیر دله اتّا اساسی گام دوندمی.
ایرانِ فرهنگیونِ صنفی تشکلئونِ هماهنگیِ شورا