ماری زوؤنِ جهانی روجِ واسی
ماری زوؤنِ جهانی روج، ایته فرصت ایسه تا آدمؤنِ فردی و جمعی زندگی مئن، زوؤنِ جیگا سر دِبارأ فکر بوکونیم؛ ایته روج فرهنگی تکثرِ پاس داشتنِ رِ و یادآوری أ اساسی حقیقت که زوؤن خالی ارتباطِ ابزار نیه، بلکه امی فکر، هویت، عاطفه و جهانِ مئن چوتو زیستنأ شکل دِهه. انسان زوؤنِ امرأ فکر کونه، تصمیم گیره و خو احساساتأ بیان کونه؛ هأنِ واسی، زوؤن انسانی کرامتِ جی سیوا نوبؤستنی بخشه.
چندزوؤنه جامعهئنِ مئن، حاکمیتِ برخورد زوؤنی تنوعِ امرأ، ایته مهمِ شاخص ایسه تا دموکراسی و فرهنگی عدالتِ میزان سنجیده ببه. آموزشی نظام و اداری ساختارِ مئن ایته زوؤن و ایته فرهنگأ بالاتر دأنستن، عملاً تانه سلطه روابطِ بازتولید و باقی زوؤنؤن و فرهنگؤنأ حاشیه راندنِ منجر ببه. تاریخی تجربه نیشؤن بدأ که خیلی کشورؤنِ مئن، تبعیض و نابرابری دروازهئن، زوؤنی و فرهنگی تبعیضِ جی وا بؤستید.
ایرانِ مئن هم مدرن دولتِ پا گیتنِ امرأ، ملل و اقوامِ جورواجور زوؤنؤن و هویتؤن کی أ جغرافیا مئن زندگی کودید، کمکم حاشیه رانده بؤستید. أ روند باعث بؤست «خودی» و «غیرخودی» مرزبندیئن پا بگیره و بخشی جه شهروندؤن احساس غریبی بوکونید و اونه پسی، بعضی اقتصادی و اجتماعی تبعیضؤن هم أ غیریتسازی سایه مئن مشروعیت پیدا کودید.
الان ایرانِ متکثر جامعه ایته تاریخی بزنگاهِ سر نیشته. علمی، فرهنگی و سیاسی آگاهیئنِ سطحِ جؤر شؤن جامعه همه قشرؤنِ مئن، چی حاشیه راندهبؤ گروهئنِ مئن و چی مسلط گروهئنِ مئن، أ امکانأ بیشتر از قبل فراهم کودهنأ تا زوؤنی و فرهنگی تنوعِ قبول کودن به عنوان ایته ملی سرمایه، به رسمیت شناخته ببه.
با ان همه، هنوز تنگنظری و انحصارطلبی صدائن گوش رسه که به جای شهروندؤنأ حقِ صاحبان دأنستن، ایته عقبمانده چارچوبِ مئن و حذف و دیگریسازی سر، نابرابر روابطِ بازتولیدِ دۊمبال ایسید.
ایرانِ فرهنگیانِ صنفی تشکؤلؤنِ شورای هماهنگی، ضمنِ ردِ هرجور زوؤنی و فرهنگی انحصارگری، همهتانِ حقِ سر ماری زوؤنِ آموزشِ دِره تأکید کونه. ما آموزشی، روانشناختی، عاطفی و جامعهشناختی حوزهئنِ وسیع یافتهئنِ پایه سر باور داریم کی ماری زوؤنِ آموزش نهتنها هیچ زوؤن یا فرهنگی ضرر نیه، بلکه کشورِ فرهنگی سرمایه تقویت، دانشآموزؤنِ اعتمادبهنفسِ جؤر شؤن، یادگیری کیفیتِ بهتر بؤستن و اجتماعی همبستگیِ گسترشِ منجر به.
ایرانِ جورواجور زوؤنؤنِ تقویت، ملی وحدتِ رِ تهدید نیه؛ بلکه ایته پایدار و داوطلبانه وحدتِ تحققِ شرط ایسه.
جامعهای کی خو تنوعأ به رسمیت بیشناسه و اونأ پاس بداره، ایته غنیتر، عادلانهتر و دموکراتیکتر جامعه به.
ماری زوؤنِ جهانی روجِ مئن، ما ایرانِ فرهنگیان دِبارأ زوؤنی تبعیضؤنِ رفعِ ضرورت، آموزشی سیاستؤنِ مئن بازنگری و ماری زوؤنِ آموزشِ به رسمیت شناختن کشورِ رسمی زوؤنِ ورجه سر تأکید کونیم و اونأ آموزشی و اجتماعی عدالتِ تحققِ راه مئن ایته اساسی قدم دانیم.
ایرانِ فرهنگیانِ صنفی تشکؤلؤنِ شورای هماهنگی