بیانیه روز جهانی زبان مادری به زبان تاتی
به خاطر رو جهانیه مایه زبون
رو جهانیه مایه زبون ای فرصتیه که فکر بیری زبون آدم زندگی فردی و اشتماعی مونه چه یاگایی دره،ای روی که جا روه ده چن فرهنگی را ارزش قایل گردی و ام حقیقت خیالی گنه که زبون فقط بدرد ارتباط منخاره ،بلکه زبون آدم فکر سامیدیه، عاطفه سامیدیه و آدم بلته می دیه چین زندی بیری . آدم زبونه بی فکر می یره، تصمیم مگره ، احساسونش ماجه؛ پس زبون ای بخش جویا نبیینین از انسون کرامته.
ایرون ده ده وقتی دولت مدرن شکلش بگه یاواش یاواش بقیه اقوام زبونیون و هویت منه بیشینده کنار .بینه چی باعث گردست ای سری مردم ای جور مرز آنیه خوشتن مونی و غریبی جویا یره، بینه مرز آنین باعث گردست ای سری فرخ آنین اقتصادیون اشتماعی ده روا بوزونیه.
الون ایرونه جامعه چند قومی در ای بزنگاه تاریخی قرارش بگردی .
الون که سطح علمیون سیاسیون فرهنگی همه اقشار مونه بیشی جور ، چه جانا مونه که کنار آنیسته وینده ،چه آنایی که مسلط وینده ،ام امکون به وجود بوموی که الاده زبونونیون و فرهنگون به عنوان ای سرمایه ملی به رسمیت بشناسین ده.آما هنوز ای سری تنگ نظر ینده که بجای اینکه جاوکینون به عنوان شهروندونی که صاحب حقنده قابول یرنده هی مشکسنده منوم پسا چین ووی ،جا دیمه ده ای سری یرنده خودی ،ای سری یرنده غریبه بینه کنا هی نابرابری ادومه آدینده .
تقویت الاده زبونون ایرونه ده نه تنها باعث منگرده که ملت با هم بین بینه ده بیشو ،بلکه اصلا بینه کنا ملت موتونو به ای شکل پایدار و داوطلبونه با هم گرده .
ای جامعه که جا مونده مردم جاوکینشش قابول دشته بی و همی احتروم آنیه، ای جامعه داراتر ،عادلونه تر و دموکرات تر مگرده.
جی رو جهانی مایه زبونه ده آما ایرون فرهنگیون ای صفر دیه تاکید می یروم که زبونون مونه ده فرخ آنین باید بینه ده بیشو سیاست های آموزشی باید اصلاح گردنده و زبون رسمی وره ده مایه زبونی بی درس بخندن باید انجوم بگره ،و جیوه ای دنه پله قادم موزونوم برای برسستن به عدالت آموزشیون اشتماعی.